അരിമ്പൂർ: മണ്ണുമായി വന്ന ടോറസ് ലോറികൾ എറവ് – കൈപ്പിള്ളി അകംപാടത്ത് പ്രദേശവാസികൾ തടഞ്ഞു. പാടം നികത്തി തൈകൾ വെക്കുന്നതിനുള്ള ശ്രമങ്ങളാണ് നടക്കുന്നതെന്നാരോപിച്ചാണ് വാഹനങ്ങൾ തടഞ്ഞത്. അരിമ്പൂർ പഞ്ചായത്തിലെ മനക്കൊടി – വെളുത്തൂർ അകമ്പാടം ഉൾപ്പടെയുള്ള ഫാം റോഡുകളുടെ നിർമ്മാണത്തിനായുള്ള മണ്ണായിരുന്നു ലോറിയിൽ.
അന്തിക്കാട് എസ്ഐ പ്രവീൺ, വനിത ജിഎഎസ്ഐ ഒ.ജെ. രാജി എന്നിവർസ്ഥലത്തെത്തി രേഖകൾ പരിശോധിച്ചതിന് ശേഷം ടോറസുകളിൽ മണ്ണടി തുടരുന്നതിന് അനുവാദം നൽകി. 4 കോടി രൂപ ചില വഴിച്ച് കർഷകർക്ക് ഉപകാരപ്രദമായി സംസ്ഥാന സർക്കാർ നിർമ്മിക്കുന്ന ഫാം റോഡിൻ്റെ നിർമ്മാണം തടസ്സപ്പെടുത്തുവാനുള്ള ശ്രമമാണ് നടക്കുന്നതെന്ന് കേരള കർഷകസംഘം അരിമ്പൂർ പഞ്ചായത്ത് പ്രസിഡൻറ് ഇ.കെ. ജയപ്രകാശ്, സെക്രട്ടറി കെ. രാഗേഷ് എന്നിവർ ആരോപിച്ചു.