അരിമ്പൂർ: മനക്കൊടി പുള്ള് റോഡരികിലുള്ള വാരിയം പടവിലെ മോട്ടോർ ഷെഡ്ഡിലെ വൈദ്യുതി മീറ്ററും പാനൽബോർഡും അനുബന്ധ ഉപകരണങ്ങളും ഉഗ്രശബ്ദത്തോടെ കത്തി നശിച്ചു ; ആർക്കും പരിക്കില്ല. തിങ്കളാഴ്ച രാവിലെ 6 മണിയോടെയാണ് അപകടം. ഉഗ്രശബ്ദം കേട്ടയുടൻ മോട്ടോർ ഡ്രൈവറും സഹായിയും പുറത്തേയ്ക്കോടിയതിനാൽ വൻ ദുരന്തമൊഴിവാക്കുകയായിരുന്നു. വിവരമറിഞ്ഞയുടൻ കെഎസ്ഇബി ജീവനക്കാരെത്തി അടിയന്തിര അറ്റകുറ്റപ്പണികൾ നടത്തി.
പ്രളയത്തിന് ശേഷം സ്ഥാപിച്ച സബ്ബ് മെഴ്സിബിൾ പമ്പാണ് ഇവിടെയുള്ളത് . സമീപത്തെ ട്രാൻസ്ഫോർമറിൽ ഷോർട്ട് സർക്യൂട്ട് ഉണ്ടായത് മൂലം വൈദ്യുത ലൈനിൽ അമിത ലോഡോ വോൾട്ടേജ് വ്യതിയാനമോ വന്നതാകും അപകടകാരണമെന്നാണ് പ്രാഥമിക നിഗമനം. കാൽ ലക്ഷത്തോളം രൂപയുടെ നഷ്ടം ഉണ്ടായിട്ടുണ്ടെന്ന് പടവ്കമ്മറ്റി ഭാരവാഹികൾ അറിയിച്ചു . പാടത്തെ വെള്ളം വറ്റിക്കുന്ന സമയത്തുണ്ടായ അപകടം കർഷകരെ ആശങ്കയിലാക്കിയിട്ടുണ്ടെങ്കിലും ഉടൻ പമ്പിങ് പുന;സ്ഥാപിക്കാനാകുമെന്നാണ് പ്രതീക്ഷ. ആകെ ഒരു മോട്ടോർ മാത്രം ഉള്ള ഈ പടവിലേക്ക് മറ്റൊരു മോട്ടോർ കൂടി അനുവദിക്കണമെന്ന ആവശ്യത്തിന് ഇതുവരെ പരിഹാരമായിട്ടില്ലെന്ന് പടവ് പ്രസിഡൻറ് കെ സി പുഷ്ക്കരനും, സെക്രട്ടറി കെ കെ അശോകനും പറഞ്ഞു.
