ഗുരുവായൂർ: ക്രിമിനലുകളുടെയും സാമൂഹ്യവിരുദ്ധരുടെയും അഴിഞ്ഞാട്ടത്തിൽ കച്ചവടം ചെയ്യാൻ സാധിക്കാത്തതിൽ മനം നൊന്ത് വ്യാപാരികളും കുടുംബാംഗങ്ങളും. ഗുരുവായൂരിലെ പൊതുമേഖലാ ബാങ്കുകൾ ഉൾപ്പെടെ നിരവധി ധനകാര്യ സ്ഥാപനങ്ങളും ഹോട്ടലുകളും ചെറുകിട കച്ചവടക്കാരും കൂടി 300ൽ പരം തൊഴിലാളികൾ ജോലി ചെയ്യുന്ന കിഴക്കേ നടയിലെ മേൽപ്പാലത്തിന് സമീപം സാമൂഹ്യവിരുദ്ധരുടേയും ക്രിമിനലുകളുടേയും മോഷ്ടാക്കളുടേയും അക്രമകാരികളുമായ നാടോടി സംഘങ്ങളുടെയും കടന്നു കയറ്റം നിയന്ത്രിക്കുന്നതിന് പ്രദേശത്തെ നൂറോളം വരുന്ന വ്യാപാരിസമൂഹവും കുടുംബാംഗങ്ങളും ലോക മനുഷ്യാവകാശ ദിനത്തിൽ മനുഷ്യാവകാശ കമ്മീഷന് മുൻപാകെ ഭീമ ഹർജി സമർപ്പിച്ചു. കച്ചവട സ്ഥാപനങ്ങൾക്കും, പരിസരവാസികൾക്കും, വഴിയാത്രക്കാർക്കും ഭീഷണിയാകുന്ന തരത്തിൽ പൊതുസ്ഥലം കയ്യേറി മദ്യപിക്കുകയും ലഹരി ഉപയോഗിക്കുകയും വില്പന നടത്തുകയും കടകൾക്കു മുൻപിൽ മലമൂത്ര വിസർജ്ജനം നടത്തുകയും പതിവായതിനെ തുടർന്നാണ് ഷോപ്പ് ആൻഡ് എസ്റ്റാബ്ലിഷ്‌മെന്റ് വർക്കേഴ്സ് വെൽഫെയർ അസോസിയേഷൻ പ്രസിഡണ്ട് അജു.എം.ജോണി, സെക്രട്ടറി ഇ.ആർ. ഗോപിനാഥൻ, പി.വി.ഗിരീഷ് എന്നിവരുടെ നേതൃത്വത്തിൽ ഭീമഹർജി തയ്യാറാക്കി നൽകിയത്.
ലോക മനുഷാവകാശ ദിനത്തിൽ മൗലികാവകാശ സംരക്ഷണത്തിനായി മനുഷ്യാവകാശ കമ്മീഷന് ഭീമഹർജിയുമായി ഗുരുവായൂരിലെ വ്യാപാരികളും കുടുംബാംഗങ്ങളും
