തളിക്കുളം: ഗ്രാമപഞ്ചായത്ത് മാലിന്യമുക്ത നവകേരളം ക്യാമ്പയിനുമായി ബന്ധപ്പെട്ട് ഹരിത പ്രഖ്യാപനം നടത്തി. പഞ്ചായത്ത് പ്രസിഡൻ്റ് പി ഐ സജിത ചടങ്ങ് ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ എം കെ ബാബു അധ്യക്ഷത വഹിച്ചു. 2025 മാർച്ച് 30 അന്താരാഷ്ട്ര സീറോ വേസ്റ്റ് ദിനത്തിൽ കേരളത്തെ മാലിന്യമുക്ത നവകേരളമായി പ്രഖ്യാപിക്കുക എന്നതാണ് പദ്ധതിയുടെ ലക്ഷ്യം. അതിനോടനുബന്ധിച്ച് വലിച്ചെറിയൽ വിരുദ്ധ ക്യാമ്പയിൻ പോലുള്ള ഒട്ടനവധി പ്രവർത്തനങ്ങൾ പഞ്ചായത്തിന്റെ നേതൃത്വത്തിൽ നടന്നുവരുന്നു. തളിക്കുളം ഗ്രാമപഞ്ചായത്തിന്റെ പരിധിയിലുള്ള നമ്പികടവ് ബീച്ച് മുതൽ ഇടശ്ശേരി ബീച്ച് വരെയുള്ള പ്രദേശങ്ങളെല്ലാം തന്നെ പഞ്ചായത്തിന്റെ നേതൃത്വത്തിൽ ശുചീകരണ പ്രവർത്തനങ്ങൾ നടത്തി 50 ബോട്ടിൽ ബൂത്തുകൾ സ്ഥാപിച്ചു. മാലിന്യസംസ്കരണ കേന്ദ്രമായ എം സി എഫ് ഉൾപ്പെടെയുള്ള വിവിധ പ്രദേശങ്ങളിൽ സിസിടിവി ക്യാമറകൾ സ്ഥാപിച്ചു വരുന്നു. മാലിന്യമുക്തം നവകേരളം ജനകീയ ക്യാമ്പയിന്റെ ഭാഗമായി ഹരിത പഞ്ചായത്ത് എന്ന ലക്ഷ്യം പൂർത്തീകരിക്കുന്നതിനായി പഞ്ചായത്തിന്റെ പരിധിയിലുള്ള പ്രധാന ജംഗ്ഷനുകൾ, മാർക്കറ്റുകൾ, ടൂറിസ്റ്റ് ഡെസ്റ്റിനേഷൻ, ബസ്റ്റാൻഡ്, ആശുപത്രി, വിദ്യാഭ്യാസ സ്ഥാപനങ്ങൾ, അങ്കണവാടികൾ, ഓഫീസുകൾ, ജല സുരക്ഷ എന്നീ മേഖലകൾ കാര്യക്ഷമവും മാതൃകാപരവുമായ പ്രവർത്തനങ്ങൾ നടത്തിവരുന്ന സ്ഥാപനങ്ങളെയാണ് ഹരിത പ്രഖ്യാപനത്തിനായി തെരഞ്ഞെടുത്തത്. തളിക്കുളം ഗ്രാമപഞ്ചായത്തിന്റെ കീഴിലുള്ള 12 വിദ്യാലയങ്ങൾ, 26 അങ്കണവാടികൾ , ഘടകസ്ഥാപനങ്ങൾ, ഓഫീസുകൾ,കുടുംശ്രീ, സ്നേഹതീരം ബീച്ച് എന്നീ മേഖലകൾക്കാണ് ഹരിത പദവി നൽകുന്നത്. ചടങ്ങിൽ തളിക്കുളം ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ ബുഷറ അബ്ദുൾ നാസർ, വാർഡ് മെമ്പർമാരായ ഐ.എസ്. അനിൽകുമാർ, വിനയ പ്രസാദ്, സന്ധ്യ മനോഹരൻ, സുമന ജോഷി, ബിന്നി അറക്കൽ, പഞ്ചായത്ത് സെക്രട്ടറി സിന്ധു, അസി. സെക്രട്ടറി തങ്കം, വിഇഒ രശ്മി, ഹെൽത്ത് ഇൻസ്പെക്ടർ സിനി. കെ.എ, കുടുംബശ്രീ ചെയർപേഴ്സൺ മീന രമണൻ, ബ്ലോക്ക് ഹരിത കേരളം മിഷൻ ആർ പി വൈഷ്ണവ്, കുടുംബാരോഗ്യ കേന്ദ്രം ഹെൽത്ത് ഇൻസ്പെക്ടർ മുജീബ്, വെറ്റിനറി ഡോക്ടർ ആര്യ, ഐആർടിസി കോഡിനേറ്റർ സുജിത്ത്, സ്കൂൾ അധ്യാപകർ, സാക്ഷരത പ്രേരക് മിനി അങ്കണവാടി അധ്യാപകർ, ഹരിത കർമ്മ സേന അംഗങ്ങൾ, വാട്ടർ അതോറിറ്റി ജീവനക്കാർ, കുടുംബശ്രീ പ്രവർത്തകർ എന്നിവരും പരിപാടിയിൽ പങ്കെടുത്തു.
മാലിന്യ മുക്ത നവകേരളം: തളിക്കുളം ഗ്രാമ പഞ്ചായത്ത് ഹരിത പ്രഖ്യാപനം നടത്തി.
