തളിക്കുളം: ഗ്രാമപഞ്ചായത്ത് കൃഷിഭവൻ നേതൃത്വത്തിൽ ഓണസമൃദ്ധി-2024 എന്ന പേരിൽ കർഷക ചന്ത ആരംഭിച്ചു. തളിക്കുളം ഗ്രാമപഞ്ചായത്ത് പ്രസിഡന്റ് പി.ഐ. സജിത ഉദ്ഘാടനം ചെയ്തു. വികസന സ്റ്റാൻഡിങ് കമ്മിറ്റി ചെയർമാൻ എ.എം. മെഹബൂബ് അധ്യക്ഷത വഹിച്ചു. 11 മുതൽ ഉത്രാടദിനം വരെ നാല് ദിവസങ്ങളിലാണ് ഓണച്ചന്ത നടക്കുന്നത്. ഹോർട്ടികോർപ്പിന്റെ കർഷകരിൽനിന്ന് സംഭരിച്ച പച്ചക്കറികളും തളിക്കുളം ഗ്രാമപഞ്ചായത്തിലെ കർഷകരുടെ ജൈവ പച്ചക്കറികളും നേന്ത്രക്കായ കുലകളും കർഷക ചന്തയിൽ ലഭ്യമാണ്. കർഷകരിൽനിന്ന് വിപണിവിലയെക്കാൾ പത്ത് ശതമാനം വില അധികം കൊടുത്ത് പച്ചക്കറികൾ സംഭരിക്കുകയും 30 ശതമാനം വിലക്കുറവിൽ ഉപഭോക്താക്കൾക്ക് വിതരണം ചെയ്യുകയുമാണ് കർഷക ചന്ത വഴി ചെയ്യുന്നത്. വൈസ് പ്രസിഡന്റ് പി.കെ. അനിത ജനപ്രതിനിധികളായ ബുഷ്റ അബ്ദുൽ നാസർ, എം.കെ. ബാബു, ഭഗീഷ് പൂരാടൻ, ഐ.എസ്. അനിൽകുമാർ, കെ.കെ. സൈനുദ്ദീൻ, തളിക്കുളം ഗ്രാമപഞ്ചായത്ത് അസിസ്റ്റന്റ് സെക്രട്ടറി ചന്ദ്രമണി, ജൂനിയർ സൂപ്രണ്ട് തങ്ക, കുടുംബശ്രീ ചെയർപേഴ്സൻ മീന രമണൻ, വൈസ് ചെയർ പേഴ്സൻ ലൈല ഉദയൻ എന്നിവർ സംസാരിച്ചു. കാർഷിക വികസന സമിതി അംഗങ്ങളായ ഇ.പി.കെ. സുഭാഷിതൻ, ടി.എൽ. സന്തോഷ്, പ്രകാശൻ, അഭിമന്യു, കൃഷി അസിസ്റ്റന്റുമാരായ ജിഷ, മാജി, രമ്യ, സയന എന്നിവർ ഓണച്ചന്തക്ക് നേതൃത്വം നൽകി. തളിക്കുളം ഗ്രാമപഞ്ചായത്ത് കൃഷി ഓഫിസർ അഞ്ജന നന്ദി പറഞ്ഞു.
തളിക്കുളത്ത് കർഷക ചന്ത ആരംഭിച്ചു
